జి.కొండూరు మండ‌లం వెల్ల‌టూరులో భారీ చోరీ

వెల్ల‌టూరులోని ప్రాథమికోన్నత పాఠశాలలో ఉపాధ్యాయుడిగా పనిచేస్తున్న భాగవతుల వెంకటరాజమోహన్‌ ఈ నెల 4వ తేదీన ఇంటికి తాళం వేసి కుటుంబ సభ్యులతో కలిసి తిరుపతి వెళ్లారు. తిరిగి ఆదివారం ఉదయం ఇంటికి చేరుకొనేసరికి ఇంటి తాళాలు పగులగొట్టి ఉన్నాయి. బీరువాను సైతం పగులగొట్టి విలువైన బంగారు వస్తువుల్ని దోచుకొన్నట్టు గమనించారు. వెంటనే పోలీసులకు సమాచారమివ్వడంతో జి.కొండూరు ఎస్సై డి.రాజేష్‌ సిబ్బందితో వచ్చి పరిశీలించారు. బీరువాలో ఉన్న దాదాపు 55 గ్రాముల బంగారు ఉంగరం, గొలుసులు, చెవిదిద్దులు, గాజులు, వెండి గ్లాసులు, గంధపు బరిణెలు, కుంకుమ బరిణెలు, ఉద్ధరిణి తదితర వస్తువులు చోరీకి గురైనట్టు రాజమోహన్‌ భార్య వరలక్ష్మి పోలీసులకు ఫిర్యాదు చేశారు. సుమారు రూ.50 వేల నగదు కూడా చోరీకి గురైనట్టు రాజమోహన్‌ తెలిపారు. చోరీకి గురైన వస్తువుల విలువ రూ.3 లక్షలకు పైబడి ఉంటుందని చెపుతున్నారు. దొంగతనం గురించి చుట్టుపక్కల వారికి ఏ మాత్రం అనుమానం రాకుండా దొంగలు చర్యలు తీసుకున్నారు. ఇంటి ముందు వైపు తలుపులను ముట్టుకోకుండా దక్షిణ వైపు గోడ దూకి లోపలికి ప్రవేశించడంతో ఎవరికీ తెలియకుండా పోయింది. రాజమోహన్‌ 4వ తేదీ రాత్రి వూరెళ్లగా.. దొంగతనం ఎప్పుడు జరిగిందో తెలియని పరిస్థితులు ఏర్పడ్డాయి. దొంగతనం జరిగి రెండు మూడు రోజులై ఉండవచ్చని పోలీసులు అనుమానం వ్యక్తం చేస్తున్నారు.