తెలుగు రాష్ట్రాల గ‌జ‌దొంగ అరెస్టు

వ్యసనాలకు బానిసై వరస దొంగతనాలకు పాల్పడుతూ ఉభయ తెలుగు రాష్ట్రాల పోలీసులకు కొరకరాని కొయ్యగా మారిన వ్యక్తి కాకినాడ పోలీసులకు చిక్కాడు. పక్కగా వ్యూహంతో వలపన్నిన పోలీసులు నిందితుడిని పట్టుకున్నారు. కాకినాడలో జిల్లా అదనపు ఎస్పీ ఏఆర్‌ దామోదర్‌ గురువారం విలేకరుల సమావేశం ఏర్పాటు చేసి వివరాలను వెల్లడించారు. హైదరాబాద్‌ ఎస్‌ఆర్‌ నగర్‌ దరి బాపు నగర్‌ కాలనీకి చెందిన బుర్రా శ్రీనివాస గౌడ్‌(43) ఇరవై ఏళ్లుగా చోరీలకు పాల్పడుతూ పోలీసులకు సవాలుగా మారాడు. ఇతడు హైదరాబాద్‌ పరిసర ప్రాంతాలతో పాటు మహబూబ్‌నగర్‌, ఖమ్మం, నందిగామ, మంగళగిరి, విజయవాడ, రాజమహేంద్రవరం, కాకినాడల్లో పలు దొంగతనాలకు పాల్పడ్డాడు. బుధవారం సాయంత్రం పక్కా సమాచారంతో నిందితుడ్ని కాకినాడ సాంబమూర్తినగర్‌, వంతెన కింద, ఎర్రరోడ్డు బాలాజీ నగర్‌లో పట్టుకున్నారు. నిందితుడి నుంచి రూ.10,52,000 విలువ చేసే సొత్తును పోలీసులు స్వాధీనం చేసుకున్నారు. నిందితుడు దుకాణాల తాళాలు బద్దలు కొట్టి దొంగతనాలు చేయడంలో దిట్ట.