యువ‌కుడిని చాకుతో పొడిచి చంపిన కేసులో నిందితుని అరెస్ట్

విజ‌య‌వాడ‌లోని ల‌బ్బీపేట పి అండ్‌ టి క్వార్టర్లలో ఈ నెల 18న సాయంత్రం తిమ్మిరి కిరణ్‌కుమార్‌ అనే యువకుడిని చాకుతో పొడిచి చంపిన కేసులో నిందితుడైన పొలిమెట్ల శ్రీకాంత్‌ను కృష్ణలంక పోలీసులు శనివారం అరెస్టు చేశారు. ఈ నెల 18న సాయంత్రం 4.30 ల సమయంలో లబ్బీపేట పి అండ్‌ టి క్వార్టర్స్‌లోని ఖాళీ స్థలంలో తిమ్మిరి కిరణ్‌కుమార్‌, రవితేజ, కార్తీక్‌, వంశీకృష్ణ, రేవంత్‌, చందు, పవన్‌, ఆది, అవినాష్‌ తిదితరులు క్రికెట్‌ ఆడుతున్నారు. సుమారు 4.45 గంటల సమయంలో చందు అనే యువకుడు బాల్‌ను కొట్టగా అది సమీపంలో ఉన్న దేవకీదేవి అనే మహిళకు తగిలింది. క్రికెట్‌ ఆడుతున్న వారంతా ఆమెకు క్షమాపణలు చెప్పారు. ఈ క్రమంలో మేడపై నుంచి చూస్తున్న దేవకీదేవి కుమారుడు శ్రీకాంత్‌ అక్కడకు వచ్చి వారందరినీ దుర్భాషలాడారు. కిరణ్‌కుమార్‌ ఈ విషయమై కల్పించుకోగా వారిద్దరి మధ్య ఘర్షణ జరిగింది. గతంలో శ్రీకాంత్‌, కిరణ్‌కుమార్‌ల మధ్య గొడవలు ఉన్నాయని ఏసీపీ శ్రీనివాసరావు వెల్లడించారు. ఇదంతా మనసులో పెట్టుకున్న శ్రీకాంత్‌ కోపంతో ఇంట్లోకి వెళ్లి ఒక చాకును తీసుకువచ్చి కిరణ్‌కుమార్‌ ఛాతిలో ఎడమవైపు పొడిచాడు. దీంతో అతను కుప్పకూలిపోగా బంధువులు, చుట్టుపక్కల వారు అతనిని ప్రభుత్వాసుపత్రికి తీసుకువెళ్లారు. అప్పటికే అతను మృతి చెందినట్లు వైద్యులు ద్రువీకరించారు. దీనిపై కేసు నమోదు చేసిన కృష్ణలంక పోలీసులు నిందితుడి శ్రీకాంత్‌ కోసం గాలింపు చేపట్టారు. శనివారం ఉదయం పి అండ్‌ టి క్వార్టర్లలోకి దొంగచాటుగా వస్తుండగా కృష్ణలంక సీఐ చంద్రశేఖర్‌ తన సిబ్బంది సాయంతో శ్రీకాంత్‌ను అరెస్టు చేశారు. సమీపంలోని పొదల్లో పడేసిన చాకును స్వాధీనం చేసుకున్నారు.