గుంటూరు జిల్లా నుంచి 419 మందికి హ‌జ్ యాత్ర‌కు అవ‌కాశం

2017 హజ్ కు సంబంధించి హాజ్ యాత్రికుల్లో అవగాహన పెంచడం కోసం గుంటూరు లోని అంజుమన్ ఇస్లామియా షాదిఖానాలో ప్రత్యేక హజ్ క్యాంప్ నిర్వహించారు. హ‌జ్ పిలిగ్రిమ్స్ సౌసైటీ ఆధ్వ‌ర్యంలో జ‌రిగిన ఈ క్యాంప్‌ను తెలుగుదేశం పార్టీ ఎమ్మెల్సీ ఎం.ఎ.ష‌రీఫ్ లాంఛ‌నంగా ప్రారంభించారు. మైనార్టీ ఫైనాన్స్ కార్పోరేష‌న్ ఛైర్మ‌న్ హిదాయ‌త్‌, గుంటూరు శాస‌న‌స‌భ్యులు ముస్త‌ఫా, ఎపి హ‌జ్ క‌మిటీ ఎగ్జిక్యూటివ్ ఆఫీస‌ర్ లియాఖ‌త్ అలీతో పాటు మ‌త‌పెద్ద‌లు పాల్గొన్నారు. హ‌జ్ పిలిగ్రిమ్స్ సౌసైటీ అధ్య‌క్షులు ముహ‌మ్మ‌ద్ ర‌ఫీ మాట్లాడుతూ హ‌జ్ యాత్రికుల్లో అవ‌గాహ‌న పెంచ‌డం కోసం ప్ర‌తి సంవ‌త్స‌రం మూడు సద‌స్సులు నిర్వ‌హించి అంద‌రికీ భోజ‌న‌సదుపాయం క‌ల్పిస్తున్నామ‌ని చెప్పారు. హ‌జ్ యాత్రికుల‌కు ఈ శిక్ష‌ణ ఎంతో ఉప‌యోగ‌క‌రంగా వుండ‌టంతో పాటు సౌదీ అరేబియాలో ఎలాంటి అసౌక‌ర్యానికి గురి కాకుండా వుంటుంద‌ని ఆయ‌న చెప్పారు. గుంటూరు జిల్లా నుంచి 419 మందికి హ‌జ్ యాత్ర చేయ‌డానికి అవ‌కాశం వ‌చ్చింద‌ని, వెయిటింగ్ లిస్ట్‌లో మ‌రి కొంత మందికి అవ‌కాశం ల‌భిస్తుంద‌ని ఎమ్మెల్సీ ఎం.ఎ.ష‌రీఫ్ ఈ సంద‌ర్భంగా చెప్పారు. జీవితంలో ల‌భించిన ఈ అవ‌కాశాన్ని స‌ద్వినియోగం చేసుకోవాలంటే పూర్తి స్థాయిలో శిక్ష‌ణ పొంది హ‌జ్ యాత్ర చేయాల‌ని ఆయ‌న సూచించారు. హ‌జ్ విధి విధానాలు ఎలా పూర్తి చేయాలి. ఆధ్యాత్మికంగా ఎలా వుండాలి అన్ని విష‌యాలు సంపూర్ణంగా తెలుసుకోవాలి. ఇంకా మూడు నెల‌ల స‌మ‌యం వుంది కాబ‌ట్టి ప్ర‌తి హ‌జ్ యాత్రికుడు క్షుణంగా తెలుసుకోవాల‌ని ఎమ్మెల్సీ ష‌రీఫ్ సూచించారు. మ‌క్కా చేరుకున్న త‌రువాత ప్ర‌తి హాజీ త‌మ చేతికి ఎల్లో క‌ల‌ర్‌లో వుండే బ్రెస్‌లెట్ త‌ప్ప‌ని స‌రిగా తొడిగి వుండాలి. హ‌జ్ యాత్ర చేసేట‌ప్పుడు హాజీకి ఇచ్చే రైల్వే టికెట్‌ను కూడా చేతికి వాచీ క‌ట్టుకున్న‌ట్లు తొడ‌గాల‌ని ఆయ‌న సూచించారు. ఈ కార్య‌క్ర‌మంలో మ‌త పెద్ద‌లు హ‌జ్ విధి విధానాలు, ప‌ద్ధ‌తులను వివ‌రించారు. బుధవారం 26వ తేదీ నాడు ఉదయం 9 గంటల నుంచి సాయంత్రం 5 గంటల వరకు ఈ కార్యక్రమం జ‌రిగింది. గుంటూరు జిల్లాకు సంబంధించిన హజ్ యాత్రికులు, వెయిటింగ్ లిస్ట్ లో వున్న వారు ఈ కార్య‌క్ర‌మంలో పాల్గొన్నారు.