ఆందోళ‌న‌, డిప్రెష‌న్‌, ఒత్తిడికి... ప్ర‌కృతే మందు

ప్రతిరోజూ చెట్లను, పక్షులను చూస్తే ఆందోళన, మానసిక ఒత్తిడి, డిప్రెషన్‌ తగ్గిపోతుందని తాజా పరిశోధనలో తేలింది. యూనివర్శిటీ ఆఫ్‌ ఎగ్జీటర్‌ అండ్‌ యూనివర్శిటీ ఆఫ్‌ క్వీన్స్‌లాండ్‌వారు చేసిన పరిశోధనలో తేలిన విశేషాలివి.. ప్రకృతితో అనుబంధం ఉండే మనిషికి మానసిక ఒత్తిడి తక్కువగా ఉంటుంది. ఆకుపచ్చ చెట్లు, కిలకిలమంటూ పక్షులు చేసే శబ్దం టెన్షన్‌ను తగ్గిస్తాయని పరిశోధకులు తెల్సుకున్నారు. ఇందుకోసం 270 మందిని ప్రయోగం కోసం తీసుకున్నారు. యుక్తవయసు నుంచి అరవై ఏళ్ల వరకూ ఈ పరిశోధనలో భాగమయ్యారు. రోజూ ఉదయాన్నే లేచాక ఇంటి ముందు వాలిన పిచ్చుకలు, పావురాలు, కాకులు, చిలుకలు.. కనీసం కోళ్లను చూసినా మానసిక ఒత్తిడి తగ్గిపోతుందని తేలింది. కొందరు రోజూ పక్షులను చూడటం, మరికొందరు వారానికి ఒకసారి పక్షులను చూడటం, ఇంకొందరు ఎక్కువగా పక్షులకి గింజలు పోసి, పక్షులతో ఆడుకోవటం చేశారు. ఇలా పక్షులతో అనుబంధం పెంచుకున్న ప్రతి ఒక్కరిలో టెన్షన్‌ తగ్గిపోయింది. డిప్రెషన్‌ మూడ్‌లోకి వెళ్లినవారు సైతం పక్షులను చూసి జాలీగా గడిపారు. అనూహ్యంగా డిప్రెషన్‌ నుంచి బయటికొచ్చి మామూలుగా ప్రవర్తించారు. మొత్తానికి చెట్లు, పక్షుల పెంపకం అనేది మనదేశంలో పూర్వీకుల నుంచీ ఉంది. అంతెందుకూ పల్లెటూళ్లలోని ఇంటి వసారాల్లో జొన్నకంకుల్ని పిచ్చుకలు, చిలుకలు, పావురాలు తినేందుకే వేలాడదీస్తారు. మొత్తానికి ప్రతిరోజూ ఏ వేళలో అయినా పక్షులను చూస్తే చాలు.. మనిషిలోని ఆందోళన తగ్గిపోతుందని శాస్త్రవేత్తలు ప్రయోగపూర్వకంగా నిరూపించారు.