నాగాయ‌లంక‌లో జ‌ల‌క్రీడ‌ల ఏర్పాటుకు స్థ‌ల ప‌రిశీల‌న‌

జలక్రీడల శిక్షణా కేంద్రంగా ఎంపికైన నాగాయలంకలో ఏయే క్రీడలకు అవకాశాలున్నాయనే విషయంపై అధ్యయనం చేసేందుకు శాప్‌ ప్రతినిధి బృందం నాగాయలంకలో పర్యటించింది. శాప్‌ ఉప సంచాలకుడు(డీడీ) వి.నాగరాజు, డీఎస్‌డీవో సిరాజుద్డీన్‌ బుధవారం నాగాయలంక శ్రీరామ పాదక్షేత్రాన్ని సందర్శించి అవకాశాలను పరిశీలించారు. రాష్ట్రంలోనే మొదటి జలక్రీడల శిక్షణా కేంద్రంగా నాగాయలంకను తీర్చిదిద్దాలని భావిస్తున్న శాప్‌ ప్రతినిధి బృందం విద్యార్థుల వసతి కోసం తాత్కాలిక ప్రాతిపదికన కె.పాలెం ప్రాథమిక పాఠశాలను పరిశీలించారు. జలక్రీడల శిక్షణకు అతి ముఖ్యమైన రివర్‌ఫ్రంట్‌ కోసం నాగాయలంక శ్రీరామ పాదక్షేత్రం ఘాట్‌ పక్కన ఉన్న 200మీటర్ల స్థలాన్ని పరిశీలించి వెంటనే మూడు వరసల స్టోరేజ్‌ షెడ్‌ను ఏర్పాటు చేయాలని నిర్ణయించారు.నాగాయలంక శ్రీరామ పాదక్షేత్రంలోని బ్యాక్‌వాటర్‌ పాయ జలక్రీడల శిక్షణకు అనువైన ప్రాంతమని శాప్‌ డీడీ నాగరాజు తెలిపారు. దాదాపు 40 కి.మీ.ల పొడవున్న నదిలో కేవలం 5 కి.మీ.ల మేర మాత్రమే శిక్షణ కార్యక్రమాలు జరుగుతాయని, మిగిలిన ప్రాంతాలకు భిన్నంగా ఆటుపోట్ల వడి వేగానికి (అండర్‌ కరెంట్‌) వ్యతిరేక దిశలో విద్యార్థులకు శిక్షణ పొందే అవకాశం ఉంటుందన్నారు. దీని వల్ల అంతర్జాతీయ పోటీల్లో సాధారణ కొలనుల్లో క్రీడాకారులు మంచి నైపుణ్యాన్ని కనబరిచే అవకాశం ఏర్పడుతుందని నాగరాజు తెలిపారు. సెయిలింగ్‌, కయాకింగ్‌, రోయింగ్‌ తదితర క్రీడలకు ఇక్కడ శిక్షణ ఇస్తామని, జూన్‌, జులై నాటికి ఈ కేంద్రాన్ని ప్రారంభించాలని భావిస్తున్నట్లు ఆయన తెలిపారు.