ఉత్సాహంగా కృష్ణా యూనివ‌ర్శిటీ స్నాత‌కోత్స‌వం

మ‌చిలీప‌ట్నంలో కృష్ణా విశ్వవిద్యాలయం 4వ స్నాతకోత్సవం శ‌నివారం ఆహ్లాద‌క‌ర వాతావ‌ర‌ణంలో జ‌రిగింది. విశ్వవిద్యాలయ కులపతి నరసింహన్‌, ఉపకులపతి రామకృష్ణారావు, శాసనసభ ఉపసభాపతి మండలి బుద్ధప్రసాద్‌ వంటి ప్రముఖులు హాజరైన స్నాతకోత్సవం చారిత్రక బందరు ప్రాశస్త్యాన్ని చాటిచెప్పేందుకు వేదికగా నిలిచిందని చెప్పొచ్చు. ముఖ్యంగా ఆంధ్ర జాతీయ కళాశాల వైభవాన్ని ప్రస్తుత విద్యార్థులకు తెలియజేసింది. రాష్ట్ర గవర్నర్‌ నరసింహన్‌ మచిలీపట్నం గురించి మాట్లాడుతూ భారతదేశంలో పేరెన్నికగన్న కోపల్లె హనుమంతరావు, ముట్నూరి కృష్ణారావు వంటి ప్రముఖులు ఆంధ్ర జాతీయ కళాశాలను స్థాపించి స్వాతంత్య్రోద్యమానికి వూపిరిలూదిన పుణ్యధరిత్రి బందరు అని పేర్కొన్నారు. ఆంధ్ర జాతీయ కళాశాల బాపూజీ పాద ధూళితో పునీతమైందంటూ శ్లాఘించారు. పలువురు రచయితలు, కవులకు పురిటిగడ్డగా వెలుగొందిన సాంస్కృతిక ఘనత బందరు చరిత అంటూ ప్రస్తుతించారు. అటువంటి చారిత్రక ప్రాశస్త్యమున్న మచిలీపట్నానికి తాను రెండోసారి విచ్చేయడం తనకెంతో సంతోషదాయమని వ్యాఖ్యానించారు. గౌరవ డాక్టరేట్‌ గ్రహీత అయిన మండలి బుద్ధప్రసాద్‌ సైతం తన ప్రసంగంలో మచిలీపట్నానికి పెద్దపీట వేశారు. 1907లో బందరులో స్థాపించిన ఆంధ్రజాతీయ కళాశాల దేశంలోనే రెండోదిగా నిలవడం బందరు చరిత్రకు తలమానికమన్నారు. స్వాతంత్య్రోద్యమానికి కేంద్ర బిందువుగా ఉండగలిగిన శక్తి ఆంధ్ర జాతీయ కళాశాలకు ఉందని మహాత్ముడు వ్యాఖ్యానించడం కళాశాల వైభవానికి తార్కాణమన్నారు. దేశంలోకెల్లా మొట్టమొదటి ఆంగ్ల కళాశాల మచిలీపట్నంలోనే ఏర్పడిందన్నారు.