అత్యంత ఘ‌నంగా తిరుమ‌ల‌గిరి శ్రీ వేంక‌టేశ్వ‌ర‌స్వామి క‌ల్యాణోత్స‌వం

పండు వెన్నెలలో అత్యంత కమనీయంగా సాగిన తిరుమలేశుని కల్యాణం కనుల పండువ చేసింది. రమణీయంగా తీర్చిదిద్దిన పచ్చిపూల మండపం గుబాళింపు నడుమ శ్రీదేవి, భూదేవి సమేత వేంకటేశ్వర స్వామి కల్యాణమూర్తిగా వెలుగొందారు. మంగళవారం అర్ధరాత్రి దాటిన తర్వాత నిర్వహించిన స్వామి వారి కల్యాణాన్ని తిలకించేందుకు వచ్చిన భక్తులతో తిరుమలగిరి క్షేత్రం జనసంద్రంగా మారింది. కృష్ణా, ఖమ్మం, సూర్యాపేట, నల్గొండ, గుంటూరు, హైదరాబాద్‌ జిల్లాల నుంచి వేల సంఖ్యలో తరలివచ్చారు. వేదపండితులు నిర్ణయించిన శుభముహూర్తంలో స్వామివారు, దేవేరులు కొండపై నుంచి కిందకు దిగివచ్చారు. అర్చకుల వేదమంత్రాలతో పాటు వేదపండితుల వ్యాఖ్యానాలను ఆస్వాదిస్తూ భక్తులు కల్యాణాన్ని తిలకించారు. ప్రత్యేకంగా తెరలు ఏర్పాటు చేయడంతో చాలా మంది తిలకించారు. ఈవో ప్రసాద్‌, ఛైర్మన్‌ దరిశె విజయనరసింహారావు కన్యాదాతలుగా వ్యవహరించారు. ఆలయ ప్రధాన అర్చకులు తిరునఘరి రామకృష్ణాచార్యులు, వేదపండితులు పరాంకుశం వాసుదేవాచార్యులు తదితర అర్చక బృందం ఈ క్రతువును నిర్వహించింది. జగ్గయ్యపేట ఎమ్మెల్యే శ్రీరాంతాతయ్య దంపతులు స్వామి వారికి పట్టువస్త్రాలు సమర్పించారు. వివిధ గ్రామాల నుంచి వచ్చిన వాయిద్య బృందాలు పోటీపడి కచేరీలు నిర్వహించాయి